அதிமுவை விமர்சிக்க அச்சமும் இல்லை – ஊழல் வழக்குகள் மிச்சமும் இல்லை – திமுக தலைவர் கருணாநிதிக்கு பதில்!

திமுக தலைவர் கருணாநிதி கேள்வி- பதில் வடிவில் வெளியிட்டுள்ள அறிக்கையில் அதிமுகவை நேரடியாக விமர்சிக்க மார்க்சிஸ்ட் கம்யூனிஸ்ட் கட்சிக்கு அச்சம் என்று குறிப்பிட்டுள்ளார்.

அவரே தன்னுடைய கேள்வியில் அதிமுகவை விமர்சிக்கும் அதே நேரத்தில் திமுக ஆட்சியையும் மார்க்சிஸ்ட் கம்யூனிஸ்ட் கட்சியின் இன்றைய மாநிலச் செயலாளர் குறை சொல்லிக் கொண்டே இருக்கிறாரே என்று குறிப்பிட்டுள்ளார். எனவே அதிமுகவை விமர்சிப்பதற்கு மார்க்சிஸ்ட் கம்யூனிஸ்ட் கட்சிக்கு அச்சம் எதுவும் இல்லை என்று ஒப்புக் கொண்டிருக்கிறார். அதிமுகவைக் கண்டு அச்சப்பட வேண்டிய அவசியமும் எங்களுக்கு இல்லை. ஆனால் திமுகதான் இன்றைக்கு எந்தக் கட்சியுடன் கூட்டணி என்று முடிவு செய்ய முடியாத நிலையில், அதிமுகவைத் தவிர வேறு எந்தக் கட்சியையும் விமர்சிக்காமல் கூச்சப்பட்டுக் கொண்டிருக்கிறது.

மத்திய கூட்டணி அரசுக்கு தலைமை தாங்கும் பாஜகவைக் கூட அவர்களால் நேரடியாக குறை கூற முடியவில்லை. பாஜகவின் மதவெறி மற்றும் மக்களை பாதிக்கும் பொருளாதார நடவடிக்கைகளைக் கூட திமுகவால் சுற்றி வளைத்துத்தான் சுட்டிக்காட்ட முடிகிறது. கடந்த நாடாளுமன்ற தேர்தலில் திமுகவை மிக மோசமாக அவமானப்படுத்திய காங்கிரசையும் கடிந்து கொள்ள முடியவில்லை. கசந்து கொள்ளவும் திமுகவால் முடியவில்லை.

திமுக-அதிமுக ஆகிய இரண்டு கட்சிகளையும் விமர்சிக்கும் மார்க்சிஸ்ட் கம்யூனிஸ்ட் கட்சி கடந்த காலத்தில் இந்த இரு கட்சிகளுடனும் மாறி மாறி கூட்டணி அமைத்து வெற்றி பெற்ற போது குறை சொல்லத் தோன்றாதது ஏன் என்று கேள்வி எழுப்புகிறார். திமுகவுக்கு மட்டுமல்ல, அதிமுகவுக்கும் சேர்த்து இதன் மூலம் அவர் வக்காலத்து வாங்க முயல்கிறார்.

மதுபான கொள்முதல் துவங்கி, ஊழல், லஞ்சம், கமிஷன், இயற்கை வளத்தை சூறையாடுவது என பல்வேறு விசயங்களில் திமுகவுக்கும் அதிமுகவுக்கும் இடையில் எழுதப்படாத ஒப்பந்தம் இருக்கிறது என்ற மார்க்சிஸ்ட் கம்யூனிஸ்ட் கட்சியின் குற்றச்சாட்டு இதன் மூலம் உண்மையாகிறது. இந்த இரண்டு கட்சிகளுடனும் கூட்டணி வைத்திருந்த காலத்திலும் கூட அந்தந்த கட்சிகளின் தவறுகளை சுட்டிக்காட்ட தேவைப்பட்டபோது வீதிக்கு வந்து போராட மார்க்சிஸ்ட் கம்யூனிஸ்ட் கட்சி தயங்கியது இல்லை என்பதை திமுக தலைவர் நன்கு அறிவார்.

திமுக, அதிமுக ஆகிய இரண்டு கட்சிகளுடனும் மார்க்சிஸ்ட் கம்யூனிஸ்ட் கட்சி கடந்த காலங்களில் அவ்வப்போது எழுந்த அரசியல் சூழலுக்கு ஏற்ப தொகுதி உடன்பாடு கொண்டிருந்தது உண்மை. ஆனால், இனி நவீன தாராளமயக் கொள்கைகளை நடைமுறைப்படுத்துகிற, சமூக ஒடுக்குமுறைக்குத் துணை போகிற அல்லது சமரசம் செய்து கொள்கிற பிஜேபி, காங்கிரஸ், திமுக, அதிமுக போன்ற பிரதான கட்சிகளுடன் தொகுதி உடன்பாடு வேண்டாம் என்று மார்க்சிஸ்ட் கட்சி முடிவெடுத்தது. பிஜேபி, காங்கிரஸ், அதிமுக, திமுக, பாமக அல்லாத அணி சேர்க்கை உருவாக்க வேண்டும் என்ற முயற்சியில் மலர்ந்தது தான் மக்கள் நலக்கூட்டணி. இந்த கூட்டணியின் வெற்றிகரமான எழுச்சிப் பயணம் இரு துருவ அரசியல் நடத்தி வந்த அதிமுக, திமுக ஆகிய இரு கட்சிகளுக்கும் கலக்கத்தை ஏற்படுத்தியுள்ளது என்பதுதான் உண்மை.

அதிமுகவை விமர்சிப்பதில் மார்க்சிஸ்ட் கம்யூனிஸ்ட் கட்சி ஒருபோதும் தயங்கியது இல்லை. இன்னும் சொல்லப்போனால் திமுகவை விட மார்க்சிஸ்ட் கம்யூனிஸ்ட் கட்சிதான் அதிமுகவை கடுமையாக விமர்சித்து வருகிறது. சொத்துக் குவிப்பு வழக்கில் பெங்களூரு சிறப்பு நீதிமன்ற நீதிபதி குன்ஹா, ஜெயலலிதா உள்ளிட்டோருக்கு தண்டனை வழங்கியபோது உடனடியாக மார்க்சிஸ்ட் கம்யூனிஸ்ட் கட்சி வரவேற்றது. ஆனால் திமுக தலைவரோ துவக்கத்தில் கருத்தொன்றுமில்லை என்றார்.

அடுத்து, கர்நாடக உயர்நீதிமன்றம் தண்டனை வழங்கிய தீர்ப்பை ரத்து செய்தபோது உடனடியாக இதை எதிர்த்து உச்சநீதிமன்றத்தில் மேல்முறையீடு செய்ய வேண்டும் என்று முதன்முதலில் வலியுறுத்தியது மார்க்சிஸ்ட் கம்யூனிஸ்ட் கட்சிதான். அப்போது கூட திமுக உடனடியாக கருத்துக் கூற வில்லை.

இன்றைக்கு தமிழகம் சந்திக்கும் பல்வேறு துயரங்களுக்கு அடுத்தடுத்து வந்த திமுக மற்றும் அதிமுக ஆட்சிகள் தான் காரணம் என்று மார்க்சிஸ்ட் கம்யூனிஸ்ட் கட்சி பகிரங்கமாக, நேரடியாக குற்றம் சாட்டுகிறது. கிரானைட் ஊழலில் ரூ. 1 லட்சத்து 10 ஆயிரம் கோடி அளவிற்கு அரசுக்கு இழப்பு ஏற்பட்டுள்ளது என ஐஏஎஸ் அதிகாரி சகாயம் தனது அறிக்கையில் கூறியுள்ளார். இந்த முறைகேடு இரண்டு ஆட்சியிலும் தொடர்ந்து நடைபெற்று வந்துள்ளது. சம்பந்தப்பட்டவர்கள் யாராக இருந்தாலும் அவர்கள் மீது சட்டப்படி நடவடிக்கை எடுக்க வேண்டும் என மார்க்சிஸ்ட் கம்யூனிஸ்ட் கட்சி அச்சமின்றி, தைரியமாக கூறுகிறது. இதுபோல கூற திமுக தயாரா?

செம்பரம்பாக்கம் ஏரியை உரிய காலத்தில் திறக்காததால் சென்னை மாநகரம் பேரழிவைச் சந்தித்தது. இதற்கு பொறுப்பேற்று முதல்வர் ஜெயலலிதா உடனடியாக ராஜினாமா செய்ய வேண்டும் என்று வலியுறுத்தியது மார்க்சிஸ்ட் கம்யூனிஸ்ட் கட்சியும் இடம்பெற்றுள்ள மக்கள் நலக் கூட்டணி. ஆனால் திமுக அதுபோல கோரவில்லை.

ஆற்று மணல் கொள்ளை, தாதுமணல் கொள்ளை, நியமனங்களில் முறைகேடு, கமிஷன், கட்டிங் என்பதெல்லாம் இரண்டு ஆட்சிகளிலும் தடையின்றி தொடர்ந்து கொண்டிருக்கிறது. இரண்டு கட்சி தலைவர்கள் மீதும் நடைபெற்றுக் கொண்டிருக்கிற ஊழல் வழக்குகளே இதற்கு சாட்சி.

திமுக தலைவர் கருணாநிதி, மார்க்சிஸ்ட் கம்யூனிஸ்ட் கட்சி மாநிலச் செயலாளருக்கு திமுக மீது என்னவோ கோபம் என்று கூறியுள்ளார். எங்கள் கட்சியைப் பொறுத்தவரை தனிப்பட்ட தலைவர்கள் எந்த முடிவையும் எடுக்க முடியாது. கட்சியின் முடிவைத்தான் மாநிலச் செயலாளர் பேச முடியும். இதே போன்றுதான் முன்பு மார்க்சிஸ்ட் கம்யூனிஸ்ட் கட்சியின் மாநிலச் செயலாளராக என்.சங்கரய்யா இருந்தபோதும் திமுக கூறியது.

மார்க்சிஸ்ட் கம்யூனிஸ்ட் கட்சியைப் பொறுத்தவரை தனிப்பட்ட கோபதாபங்களின் அடிப்படையில் எந்த முடிவையும் எடுப்பதில்லை. மக்கள் நலன் சார்ந்த கொள்கை அடிப்படையிலேயே முடிவுகளை எடுக்கிறோம்.

Check Also

அயோத்தி: நீதிமன்ற நடவடிக்கைகளை நிலைகுலைவிக்காதே மார்க்சிஸ்ட் கம்யூனிஸ்ட் கட்சி அறிக்கை

ஆர்எஸ்எஸ்/பாஜக தலைவர்களும், மத்திய பாஜக அரசாங்கத்தில் அங்கம் வகித்திடும் அமைச்சர்களும், 1992 இல் பாபர் மசூதியைத் தகர்த்து, நாடு முழுதும் ...