மாற்றுத் திறனாளிகளுக்கான நிதியை கையாடல் செய்த அதிகாரிகள் மீது கடும் நடவடிக்கை எடுக்க மார்க்சிஸ்ட் கம்யூனிஸ்ட் கட்சி வலியுறுத்தல்

மாற்றுத் திறனாளிகளுக்காக ஒதுக்கப்படுகிற அரசு நிதி அத்துறையைச் சார்ந்த அரசு அதிகாரிகளால் கையாடல் செய்யப்படுவதாக செய்திகள் வந்த வண்ணமுள்ளன. மதுரை, ஈரோடு, நாமக்கல், சென்னை, தூத்துக்குடி ஆகிய மாவட்டங்களில் இத்தகைய கையாடல்கள் அம்பலமாகியுள்ளன.

ஆயினும் இவ்வாறு தவறிழைத்த அதிகாரிகள் எவர் மீதும் இதுவரை எந்த வித நடவடிக்கையும் எடுக்கப்படவில்லை. தவறு செய்த ஒரு சில அதிகாரிகளை ஊர்மாற்றம் மட்டும் செய்துள்ளனர். இது ஒழுங்கு நடவடிக்கை என ஏற்றுக் கொள்ள முடியாது. இத்துறையின் மாநில ஆணையருக்கு இப்பிரச்சனையை மாற்றுத் திறனாளி அமைப்புகள் கொண்டு சென்ற போது தன்னால் எதுவும் செய்ய இயலாது என பொறுப்பற்ற முறையில் கை விரித்துவிட்டதாகக் கூறப்படுகிறது. சமூகத்தில் மிகவும் நலிந்த பிரிவினரான மாற்றுத் திறனாளிகளுக்கான அரசு நிதியை கையாடல் செய்வது கடுமையான குற்றமாகும்.

எனவே தமிழக அரசு உடனடியாக தலையீடு செய்து இத்தகைய புகார்கள் குறித்து நேர்மையான விசாரணை நடத்தி தவறிழைத்த அதிகாரிகள் மீது இலாகாப்பூர்வமான நடவடிக்கைகள் மட்டுமின்றி, கிரிமினல் வழக்குப் பதிவு செய்து சட்டப்பூர்வமான நடவடிக்கைகளையும் மேற்கொள்ளுமாறு மார்க்சிஸ்ட் கம்யூனிஸ்ட் கட்சியின் தமிழ்நாடு மாநில செயற்குழு வலியுறுத்துகிறது. மேலும் மாற்றுத் திறனாளிகளுக்கு ஒதுக்கப்படுகிற நிதி முறையான வகையில் அவர்களுக்குச் சென்றடைய பல்வேறு மாற்றுத் திறனாளி அமைப்புகள் வலியுறுத்தி வருகின்றன. எனவே  கண்காணிப்பு முறையை பலப்படுத்துமாறு மார்க்சிஸ்ட் கம்யூனிஸ்ட் கட்சி தமிழக அரசை வலியுறுத்துகிறது.

Check Also

பேராசிரியர் சுந்தரவள்ளி மீது அவதூறு பரப்புபவர்களை உடனடியாக கைது செய்க!

கருத்தை எதிர் கருத்து மூலம் எதிர்கொள்ள முடியாத மதவெறியர்கள், பிற்போக்காளர்கள் அவரைத் தொடர்ந்து இழிவுசெய்து வருகின்றனர். இத்தகைய கோழைத்தனமான செயலை மார்க்சிஸ்ட் கம்யூனிஸ்ட் கட்சி வன்மையாகக் கண்டிக்கிறது.

Leave a Reply