பழிவாங்கும் விதத்தில் அரசியல் நடவடிக்கைகள்எடுப்பதுஎந்த அரசாங்கத்திற்கும் கவுரவத்தை அளித்திடாதுஅமித் ஷாவுக்கு பிருந்தா காரத் கடிதம்

புதுதில்லி, ஜூன் 22

ஏழை மக்கள் மற்றும் விளிம்புநிலையில் உள்ள மக்களுக்காக சேவை செய்து வருபவர்களுக்கு எதிராக, பழிவாங்கும் விதத்தில் அரசியல் நடவடிக்கைகள் எடுப்பது, எந்தவொரு அரசாங்கத்திற்கும் கவுரவத்தை அளித்திடாது என்று மத்திய உள்துறை அமைச்சர் அமித் ஷாவுக்கு, மார்க்சிஸ்ட் கம்யூனிஸ்ட் கட்சியின் அரசியல் தலைமைக்குழு உறுப்பினரும், மாநிலங்களவை முன்னாள் உறுப்பினருமான பிருந்தா காரத் கடிதம் அனுப்பியுள்ளார்.

மகாராஷ்ட்ர மாநிலத்தில் பீமா கொரேகான் வழக்குடன் சம்பந்தப்பட்ட அரசியல் மற்றும் மனித உரிமைகள் செயற்பாட்டாளர்களைக் கைது செய்து, மனிதாபிமானமற்ற முறையில் நடத்திக்கொண்டிருப்பது தொடர்பாக, ஞாயிறு அன்று பிருந்தா காரத் அனுப்பியுள்ள கடிதத்தில் கூறியிருப்பதாவது:

இந்தக் கடிதத்தை, பீமா கொரேகான் வழக்கில் கைது செய்யப்பட்டுள்ள அரசியல் மற்றும் மனித உரிமைகள் செயற்பாட்டாளர்கள் மனிதாபிமானமற்ற முறையில் நடத்தப்பட்டுவருவதற்குத் தங்கள் கவனத்தை ஈர்ப்பதற்காக இக்கடிதத்தை எழுதுகிறேன்.

தேசியப் புலனாய்வு முகமை விசாரணை செய்யும் வழக்குகள் தங்களின் கட்டுப்பாட்டிற்குள் வருவதால் இக்கடிதத்தைத் தங்களுக்கு எழுதுகிறேன். கைது செய்யப்பட்டுள்ள 11 பேர்களில் 9 பேர் ஏற்கனவே ஈராண்டு காலத்திற்கும் மேல் சிறையில் காவலடைப்புக் கைதிகளாக அடைக்கப்பட்டிருக்கிறார்கள். இவ்வழக்கில் புலன் விசாரணை செய்வதற்கு இரண்டு ஆண்டு காலம் என்பது தேவைக்கும் அதிகமான காலமாகவே இருந்தபோதிலும், தேசியப் புலனாய்வு முகமை புலன்விசாரணையை முடிக்காமலும், சிறையில் அடைக்கப்பட்டுள்ளவர்களின் பிணை விண்ணப்பங்களை நீதிமன்றத்தில் தொடர்ந்து எதிர்த்துக்கொண்டும் வருகிறது. சிறைப்படுத்தப்பட்டிருப்பவர்களில் பலரின் உடல் நிலை மிகவும் நலிவடைந்துள்ளன. கைது செய்யப்பட்டுள்ளவர்களில் சுதா பரத்வாஜ், சோமா சென், சுரேந்திரா கட்லிங், மகேஷ் ரவுத், அருண் ஃபெரைரா, சுதிர் தாவ்லே, ரோனா வில்சன், வெர்னன் கான்சால்வேஸ், வரவர ராவ், கௌதம் நவ்லகா மற்றும் ஆனந்த் டெல்டும்டே ஆகியவர்கள் கோவிட்-19 கொரோனா வைரஸ் தொற்று கடுமையாகப் பரவிக்கொண்டிருக்கக்கூடிய இன்றையநிலையில், மிகவும் ஆபத்தான நிலையில் வைரஸ் தொற்றுக்கு ஆளாகக்கூடிய நிலையில், அடைக்கப்பட்டிருக்கிறார்கள். இவர்கள் அனைவருமே வேறுபல நோய்களுடனும் அவதிப்பட்டு வருபவர்களாதலால், இவ்வாறு அவர்கள் அடைத்து வைக்கப்பட்டிருப்பது அவர்களுக்கு மிகவும் வடுப்படத்தக்க நிலையை ஏற்படுத்தி இருக்கிறது. 

இதில் மிகவும் சமீபத்திய உதாரணம், கௌதம் நவ்லகா மீது ஏவப்பட்டுள்ள மனிதாபிமானமற்ற நடவடிக்கையாகும். அவருடைய பிணை மனு, தில்லியில் உள்ள ஒரு நீதிமன்றத்தில் நிலுவையில் இருந்துவந்த சமயத்தில், அவரை தேசியப் புலனாய்வு முகமைக் காவல்துறையினர் மும்பைக்கு கொண்டுசென்றிருக்கிறார்கள். அங்கே அவரை, சிறைக்கு அறையில் உள்ள பள்ளிக்கூடத்தில், தனிமைப்படுத்தல் வசதிக்காக வைத்திருக்கிறோம் (quarantine) என்று சொல்லி அடைத்து வைத்திருக்கிறார்கள்.

அங்கே சுமார் 350 பேர் இருத்தி வைக்கப்பட்டிருக்கிறார்கள். இவர்கள் அனைவருக்கும் மூன்று குளியல் அறைகள் மட்டுமே. வாளிகளோ, குடுவைகளோ கிடையாது. அவர் ஒரு சிறிய வகுப்பறையில் 34 பேர்களுடன் அடைத்து வைக்கப்பட்டிருக்கிறார். நிச்சயமாக மிகவும் சுகாதாரமற்ற நிலையில் உள்ள இடத்தில் இதரர்களுடன் மிகவும் நெருக்கமாக இருக்கும் விதத்தில் அவர் இருத்தி வைக்கப்பட்டிருக்கிறார். அவர், செரிமானப் பிரச்சனைகள், மற்றும் மட்டுமீறிய உயர் ரத்த அழுத்தம் நோய்களால் அவதிப்பட்டு வருபவராவார்.   அவர் தனிமைப்படுத்தப்படும் கால அளவு முடிந்தபின்னரும், அவரைத் தண்டிக்க வேண்டும் என்ற விதத்தில், அவர் அங்கேயே வைக்கப்பட்டிருக்கிறார்.

ஓர் அரசியல் கைதி இவ்வாறு நடத்தப்படுவது மிகவும் அதிர்ச்சியளிக்கக்கூடியதாகவும், வருந்தத்தக்கவிதத்திலும் இருக்கிறது. அவருடைய பிணை மனு நிலுவையிலிருந்துவரும்வரை,  அவர் வைக்கப்பட்டிருக்கும் நிலைமைகள் குறித்து தாங்கள் பரிசீலனை செய்ய வேண்டும் என்றும், அவரை, மிகவும் சுகாதார வசதியுடன் உள்ள இடத்திற்கு மாற்றப்படுவதை உத்தரவாதப்படுத்த வேண்டும் என்றும் வலியுறுத்துகிறேன்.

மற்றுமொரு அதிர்ச்சியளிக்கக்கூடிய உதாரணம், வரவர ராவ் கைது செய்யப்பட்டிருப்பதாகும். அவருக்கு 81 வயதாகிறது. மிகவும் நலிவடைந்தநிலையில் இருந்து வருபவர். அவருக்கு பிணை மறுக்கப்பட்டது மட்டுமல்லாமல், எல்லா வசதிகளுடனுமிருந்த ஜேஜே மருத்துவமனையில் அனுமதிக்கப்பட்டிருந்த அவரை, மூன்றே நாட்களில் அங்கேயிருந்து விடுவித்து, சிறைக்குக் கொண்டுசெல்லப்பட்டிருக்கிறார். அவருடைய உடல்நலம் மிகவும் மோசமாக மாறியுள்ள நிலையிலும் அதைப்பற்றிக் கவலைப்படாமல் சிறையில் அடைக்கப்பட்டிருக்கிறார். இது, அவர் உயிர்வாழ்வதற்கான உரிமையை மறுக்கும் செயலே தவிர வேறல்ல.

திருமதி சுதா பரத்வாஜ், 60 வயதாகிறது. சர்க்கரை நோய், உயர் ரத்த அழுத்தம், ஆஸ்த்துமா ஆகியவற்றுடனும் மற்றும் காச நோயுடனும் கடந்த பல ஆண்டு காலமாகவே அவதிப்பட்டு வருபவர்.

சோமா சென், 62 வயதாகிறது. இவரும் உயர் ரத்த அழுத்தம், கடுமையான கீல்வாதம், எரிச்சலுடனான குடல்நோய் மற்றும் கண் அழுத்த நோயால் அவதிப்படுபவர்.

இவர்கள் அனைவருக்கும் நியாயமற்ற முறையில் பிணை மறுக்கப்பட்டிருக்கிறது.

கோவிட்-19 கொரோனா வைரஸ் தொற்று, அவர்களின் உயிருக்கு உண்மையிலேயே ஆபத்தை விளைவிக்கக்கூடும் என்பதால், இத் தொற்றுக் காலத்திலாவது அவர்களைத் தற்காலிகப் பிணையில் விட வேண்டும் என்ற  மனுக்களும் தேசியப் புலனாய்வு முகமையால் ஆட்சேபணைகள் எழுப்பப்பட்டதால், நீதிமன்றத்தில் ஏற்கப்படாமல் மறுக்கப்பட்டிருக்கின்றன.  

இவர்கள் பிணைமனுக்களை மறுப்பதில் எவ்வித நியாயமான காரணமும் கிடையாது. ஏனெனில் இவர்கள் அனைவருமே விசாரணையின்போது ஆஜராவதற்குத் தயாராகவே இருப்பவர்கள். கொரோனா வைரஸ் தொற்றுக் காலத்திலாவது, இவர்களின் பிணை மனுக்களை, தேசியப் புலனாய்வு முகமை ஆட்சேபிக்காது இருந்திட வேண்டும். உச்சநீதிமன்றம், கொரோனா வைரஸ் தொற்றின் காரணமாக, சிறைகளில் விசாரணைக் கைதிகளாக அடைத்து வைக்கப்பட்டிருப்பவர்களை சிறைகளிலிருந்து விடுவித்திட வேண்டும் என்றும், இது தொடர்பாக சம்பந்தப்பட்ட அரசாங்கங்களுக்கு, சிறைகளில் உள்ள “ஜனநெருக்கத்தைக் குறைத்திடுங்கள்” (“decongest jails”) என்று அறிவுரைகளை வழங்கியுள்ள நிலையிலும், அதனைச் செய்யாதிருப்பது மிகவும் வருந்தத்தக்கதாகும்.  

இந்த வழக்கில் கைது செய்யப்பட்டிருக்கிற அனைவரும், அவர்களின் மிக மோசமான உடல் நலிவின் காரணமாக,  மிகவும் வடுப்படத்தக்க நிலையில் உள்ளவர்கள். அவர்களின் பிணை மனுக்கள் மறுக்கப்பட்டிருக்கின்றன. கௌதம் நவ்லகா மிகவும் மோசமான நிலையில் அவருடைய உடல் நலம் மிக வேகமாகப் பாதிப்படையும் விதத்தில் அடைத்து வைக்கப்பட்டிருக்கிறார்.

ஏழை மக்கள் மற்றும் விளிம்புநிலையில் உள்ள மக்களுக்காக சேவை செய்து வருபவர்களுக்கு எதிராக, பழிவாங்கும் விதத்தில் அரசியல் நடவடிக்கைகள் எடுப்பது, எந்தவொரு அரசாங்கத்திற்கும் கவுரவத்தை அளித்திடாது. மும்பை சிறைகளில் உள்ள சிறைவாசிகள் மற்றும் காவல்துறையினர் கோவிட்-19 கொரோனா வைரஸ் தொற்றுக்கு ஆளாகிக்கொண்டிருப்பது அதிகரித்துக்கொண்டிருக்கக்கூடிய நிலையில், இவ்வாறு இவர்களைச் சிறையில் அடைத்து வைத்திருப்பது, மிகவும் ஆபத்தானதாகும்.

நான் மேலே எழுப்பியுள்ள பிரச்சனைகளைப் பரிசீலித்து, உரிய நடவடிக்கை எடுப்பீர்கள் என நம்புகிறேன்.

இவ்வாறு பிருந்தா காரத், அமித் ஷாவுக்கு எழுதியுள்ள  கடிதத்தில் குறிப்பிட்டுள்ளார்.

Check Also

மதுரையில் இருமடங்கு மரணங்கள் நிகழ்வது ஏன்? முதலமைச்சர் விளக்க வேண்டும்.

சு.வெங்கடேசன் எம் பி மாநில அரசு, கொரோனோ தொற்றுக்கு எதிராக மதுரையிலும் பிற தென்மாவட்டங்களிலும் எடுத்துவரும் நடவடிக்கைகள் மிகவும் கவலையளிப்பதாக ...